Komm, wandr mit auf d’ Kapfaburg
em früha Sonnastrahl.
Ond guck do dont des Locha a
sowie des schöane Tal.

Die Kirchadura standet do
ond gucket stolz dorauf.
Auf’s Zwiebeldach vom obra Doar
do scheint grad d’ Sonna drauf.

Am Stehberg diba ist a Ruah
als wär er no net wach.
Do dunta an dr alta Stoig
a Oichelhähr mecht Krach.

So langsam wurd dr Gromberg klar
ond au dr Königsbühl.
Am Erbisberg ganz oba scho
a Bussard treibt sei Spiel.

Ond ‘s Städtle selbst ist monter itzt,
ist aufg’wacht aus dr Ruah.
Die Jagst, se loft ganz gmüatlich na
ond blätschert ihr Lied d’rzua.

Dei Blick, der schwoift itzt weiter rom
vom Härtsfeld bis zom Ries.
Zom Braunaberg ond Virngrond nom ...

‘s ist grad wia em Paradies.
Itzt guck nomal die Gegend a,
ist die net wondernett?
Als wenn’s dr Herrgott extra
für os grad g’schaffa hätt.

Drom wandr mit auf d’ Kapfaburg
em früha Sonnastrahl.
Ond guck do dont des Locha a,
sowie des schöane Tal.